இரண்டு மணிநேரம் வானில் பறந்த மலைப்பாம்பு மரணம்

அவுஸ்திரேலியாவின் குயீன்ஸ்லாந்தில் உள்ள கெய்ர்ன்ஸ் என்ற இடத்திலிருந்து குவான்டாஸ் விமானம் நேற்றுக் காலை பாப்புவா நியூ கினியாவின் தலைநகரான போர்ட் மோபிஸுக்கு செல்லும் வழியிலேயே இச்சம்ம்பவம் நிகழ்ந்துள்ளது. விமானம் பறக்கத் தொடங்கிய பின் 20 நிமிடங்கள் கழித்து பெண் பயணி ஒருவர் விமான இறக்கையில் இந்த மலைப்பாம்பு சிக்கி உயிருக்குப் போராடுவதை ஜன்னல் வழியாகப் பார்த்தார்.

எனினும் நடு வானில் இந்த விமானத்தைத் புறப்பட்ட இடத்துக்கு திசை திருப்புவது உசிதமாகக் கருதப் படாததால் விமானம் போர்ட் மோபிஸுலேயே தரை இறக்கப் பட்டது. இதனால் 2 மணி நேரம் நீடித்த இந்த பயணத்தில் குளிர்ந்த காற்றை சமாளிப்பதற்கும் கீழே வீழ்ந்து விடாமல் இருப்பதற்கும் இந்த பைதொன் பாம்பு கடுமையாகப் போராடியுள்ளது. எனினும் விமானம் தரையிறக்கப் பட்ட பின்னர் இப் பாம்பு உயிரோடு காணப் படவில்லை. இறக்கையில் பல தடவை அடிபட்டதால் இரத்தம் சிந்தி உயிரை விட்டுள்ளது.

எதிர் பாராத இச்சம்பவம் வருத்தமளிப்பதாக குவான்டஸ் விமான சேவை ஊடகங்களுக்குத் தெரிவித்துள்ளது. இச்சம்பவத்தை நேரில் பார்த்த பயணிகள் கருத்துரைக்கையில் இது தமக்கு 2006 ஆம் ஆண்டு ஹாலிவுட்டில் வெளியான திகில் படமான 'Snakes on a Plane' திரைப்படத்தைப் பார்த்தது போன்ற உணர்வை மறுபடி ஏற்படுத்தியிருந்தது எனத் தெரிவித்துள்ளனர்.