ஓரின சேர்க்கை திருமணத்துக்கு அங்கீகாரம் கோரி மேலாடை இல்லாமல் பெண்கள் போராட்டம்

ஓரின சேர்க்கை திருமணத்துக்கு அங்கீகாரம் கோரி மேலாடை இல்லாமல் பெண்கள் போராட்டம் நடத்தினர். வாடிகனில் உள்ள செயின்ட் பீட்டர்ஸ் சதுக்கத்தில் கடந்தஞாயிற்றுக்கிழமை பிரார்த்தனை நடந்தது. இதில் போப் ஆண்டவர் 16-ம் பெனடிக்ட் கலந்து கொண்டார். ஏராளமான பொது மக்களும் திரண்டிருந்தனர்.

அப்போது உக்ரைன் பெண்கள் உரிமை அமைப்பை சேர்ந்த பெண்கள் சிலர் அங்கு திரண்டனர். பின்னர், திடீரென தங்களது மேலாடையை களைந்துவிட்டு அரை நிர்வாணமாக அங்கிருந்த மேடையில் ஏறி போராட்டத்தில் ஈடுபட்டனர்.

ஓரின சேர்க்கையாளர் திருமணத்துக்கு அங்கீகாரம் உள்பட அனைத்து உரிமைகளுக்கும் அங்கீகாரம் வழங்க வேண்டும் என்பன போன்ற கோஷங்களை எழுப்பினர். ஓரின சேர்க்கையாளர்களை நம்புகிறோம் என்ற வாசகத்தை தங்கள் முதுகில் எழுதியிருந்தனர். இதனால் அங்கு பதட்டமும், பரபரப்பும் ஏற்பட்டது. தகவல் அறிந்ததும் போலீசார் அங்குவந்து போராட்டத்தில் ஈடுபட்ட 4 பெண்களை கைது செய்து அழைத்து சென்றனர்.