எயிட்ஸ் நோயினால் கைதி மரணம்: சக கைதிகளுக்கு ரத்தப்பரிசோதனை !

அண்மையில் கொழும்பு விளக்கமறியல் சிறையில் எயிட்ஸ் நோயினால் கைதி ஒருவர் உயிரிழந்ததை அடுத்து அவருடன் தங்கியிருந்த சக கைதிகளின் இரத்த மாதிரியைபரிசோதனை செய்யுமாறு கொழும்பு நீதவான் நீதிமன்றம் கொழும்பு விளக்கமறியல் சிறை அதிகாரிக்கு உத்தரவிட்டுள்ளது. கொழும்பு நீதிமன்ற வைத்திய அதிகாரி தாக்கல் செய்த அறிக்கை ஒன்றை இன்று (29) பரிசீலித்த கொழும்பு மேலதிக நீதவான் சோஹன்சா ரணசிங்க இவ்வுத்தரவைப் பிறப்பித்தார்.

கடந்த மார்ச் 11ஆம் திகதி உயிரிழந்த கொழும்பு விளக்கமறியல் சிறை கைதி எயிட்ஸ் நோயால் பீடிக்கப்பட்டவர் என்பது நீதிமன்ற வைத்திய அதிகாரி தாக்கல் செய்த அறிக்கையில் உறுதிப்படுத்தப்பட்டுள்ளது. அதனால் குறித்த கைதியுடன் இருந்த சக கைதிகளின் இரத்த மாதிரியை பரிசோதனை செய்ய வேண்டியது அவசியம் எனத் தெரிவித்த நீதிமன்றம், பரிசோதனை நடத்தி அறிக்கை ஒன்றை சமர்பிக்குமாறு கொழும்பு விளக்கமறியல் சிறை அதிகாரிக்கு உத்தரவிட்டது.

மேலும் இது குறித்து ஆய்வு செய்யுமாறு கொழும்பு விளக்கமறியல் சிறைக்குப் பொறுப்பான சுகாதார அதிகாரிக்கு பணிப்பு விடுத்துள்ள நீதிமன்றம் அவரை எதிர்வரும் 5ம் திகதி நீதிமன்றில் ஆஜராகும்படி அழைப்பு விடுத்துள்ளது.