நிமலரூபனின் படுகொலை ஜெனிவாவில் மஹிந்த அரசுக்கு மரணப் பொறியாக மாறும்!

சிறைச்சாலையில் பொலிஸாரினாலும், சிறைச்சாலை அதிகாரிகளினாலும் மிலேச்சத்தனமான முறையில் அடித்துப் படுகொலை செய்யப்பட்டுள்ள தமிழ் அரசியல் கைதி நிமலரூபனின் மரணம் அடுத்த ஜெனிவா மாநாட்டில் மஹிந்த அரசுக்கு மரணப் பொறியாக மாறும் என்று ஐக்கிய சோஷலிஸக் கட்சியின் பொதுச் செயலாளர் சிறிதுங்க ஜயசூரிய தெரிவித்துள்ளார்.

நிமலரூபனின் சடலத்தை அவரின் பெற்றோரிடம் ஒப்படைக்காமல் இருப்பதன் மூலம் இலங்கையின் மனித உரிமைகளுக்குள்ள மதிப்பை இலகுவில் கணிப்பிட்டுக்கொள்ள முடியும் எனவும் அக்கட்சி அவர் சுட்டிக்காட்டியுள்ளார்.

சிறைச்சாலை அதிகாரிகள் மற்றும் பொலிஸாரின் மிலேச்சத்தனமான தாக்குதலுக்கிலக்காகி உயிரிழந்துள்ள தமிழ் அரசியல் கைதி கணேசன் நிமலரூபனின் சடலத்தை அவரின் பெற்றோரிடம் ஒப்படைப்பதற்கு மஹிந்த அரசு மறுத்து வருகின்றமை தொடர்பில் கருத்து வெளியிடும்போதே அவர் மேற்கண்டவாறு தெரிவித்தார்.

இது தொடர்பாக அவர் மேலும் தெரிவித்தவை வருமாறு:

"இலங்கையில் மனித உரிமைகள் மதிக்கப்படுவதில்லை. மனித உரிமை விவகாரங்களில் முன்னேற்றம் அவசியம் என ஜெனிவாவில் தீர்மானம் நிறைவேற்றப்பட்டது. அடுத்த வருடம் மஹிந்த அரசு மனித உரிமை விவகாரங்கள் தொடர்பில் அறிக்கை சமர்ப்பிக்கும் போது அதை சர்வதேசம் ஏற்காது. இலங்கையில் அண்மைக்காலமாக இடம்பெற்றுவரும் சம்பவங்களே இதற்குப் பிரதான காரணமாகும்.

சிறைச்சாலையில் பொலிஸாரினாலும், சிறைச்சாலை அதிகாரிகளினாலும் மிலேச்சத்தனமான முறையில் அடித்துப் படுகொலை செய்யப்பட்டுள்ள தமிழ் அரசியல் கைதி நிமலரூபனின் மரணம்கூட அடுத்த ஜெனிவா மாநாட்டில் மஹிந்த அரசுக்கு மரணப் பொறியாக மாற்றம் பெறலாம்.

இந்தப் படுகொலைச் சம்பவத்திற்கு மஹிந்த அரசு பதிலளித்தேயாகவேண்டும். இதிலிருந்து விடுபட முடியாது.

இறந்துபோன தனது மகனின் சடலத்தை எடுப்பதற்குக் கூட பெற்றோர் அல்லோலகல்லோலப்படவேண்டிய நிலைமை நாட்டில் ஏற்பட்டுள்ளது. ஏகாதிபத்திய ஆட்சியில் கூட இவ்வாறு நடைபெறாது" - என்று தெரிவித்தார் ஐக்கிய சோஷலிஸக் கட்சியின் பொதுச் செயலாளர் சிறிதுங்க ஜயசூரிய.